Служба преподобному Алексию Карпаторусскому

Служба преподобному Алексию Карпаторусскому

На велицей Вечерни:

Блажен муж:

Стихиры на “Господи воззвах” на 8, глас 4:
Подобен: Дал еси знамение:

Преподобне отче Алексие, / на земли Карпатстей просиял еси, / и ко истинней вере люди твоя обратил еси; / узы и гонения многоразличныя претерпевая, / Подвигоположника Христа непрестанно благодарил еси; / Того моли, святче Божий, // отпущения грехов наших даровати и велию милость. (Дважды)

Преподобне отче Алексие, / звездо небесная, / на тверди церковней просиявшая и землю Карпатскую светом Православия осветившая, / плененныя люди от заблуждения латинского обратившая / и ко истинней вере отцев наших приведшая; // моли Христа Бога даровати нам велию милость.

Преподобне отче Алексие, / от мирскаго жития отреклся еси, / и Христу себе поработил еси, / взем на себе ярем Его легкий и благий; / покорил еси плоть твою духови, / и тако всего себе Богови вверил еси. / Ныне же, предстоящи Престолу Вседержителя, // моли о нас да сподобит ны вечныя и блаженныя жизни во Царствии Его.

Звездо светозарная, / от Солнца Христа возженная, / возсиявшая нам днесь в земли Карпатстей, / преподобне отче Алексие, / твоими молитвами просвети темныя сердца наша, / да очистим себе от грехов покаянием, / и тако да сподобимся с тобою предстати Престолу Троицы Единосущныя, // твоими молитвами преподобне отче наш.

Угодника изряднаго / и молитвенника теплаго, / преподобнаго отца нашего Алексия, / исповедника Христова и новаго апостола, / ныне восхвалим в пениих и песнех духовных. / Егоже молитвами, Господи, избави нас вечных мук, // даруя нам велию милость.

Преподобне отче Алексие, / твердейший адаманте, / многия раны и поругания претерпел еси, / исповедуя веру Православную пред еретики злочестивыми; / от них же в темницу заключен был еси, / подражатель апостолом в сем явивыйся; / с ними же молися Христу Богу, //спастися душам нашим.

Угодника Божия и предстателя за нас усерднаго / в честней памяти его восхвалим днесь, / почитающе честныя подвиги и лобызая раны его, / иже претерпе, исповедуя Бога Вседержителя, / возвращая нас к вере отцев наших. / Егоже молитвами, о Троице Пресвятая, // прости согрешения наша и даруй нам велию милость.

Слава: глас 8
Господи Боже Вседержителю, / в Троице Святей прославляемый, / молитвами угодника Твоего, Алексия Карпаторусскаго, / утоли раздоры в земли нашей, / да вси едиными усты прославим Тя и неизреченную милость Твою, / восхваляя угодника Твоего Алексия преподобнаго.

И ныне: глас тойже Богородичен:
Царь Небесный за человеколюбие на земли явися, / и с человеки поживе: / от Девы бо Чистыя плоть приемый, / и из Нея прошедый с восприятием: / един есть Сын сугуб естеством, / но не ипостасию. / Темже совершенна Того Бога / и совершенна человека воистину проповедающе, / исповедуем Христа Бога нашего: / Егоже моли Мати Безневестная,// помиловатися душам нашим.

Вход. Прокимен дне

и чтение три преподобническия.

На литии стихиры глас 5.
Подобен: Радуйся :

Радуйся, преподобне отче наш Алексие, / звездо светозарная, / в земли нашей днесь возсиявшая / и ко Христу Богу нас приведшая. / Апостолом во всем житии твоем поревновал еси, / истинную веру отцем нашим проповедал еси; / непрестанно моли о нас Господа нашего Христа, / даровати нам велию милость.

Радуйся, преподобне отче наш Алексие, / новый исповедниче Христов, / биения и раны кротко претерпевый, / веры ради отеческия; / тако нас научая за Христа вся безропотно претерпевати, / и в вере Православней твердо стояти. / Темже моли Подвигоположника о нас, / да подаст нам оставление грехов и велию милость.

Радуйся, преподобне отче наш Алексие, / радуйся, новый апостоле. / Радуйся, преподобным в житии иночестем последовал еси; / радуйся, апостолом в проповеди Евангельстей подражавый. / Вся красная мира сего презрев еси, / Единаго Бога возлюбил еси, / в молитвах и подвигах к Нему Единому горел еси. / Темже моли Его о нас, // да и мы пребудем в любви Его во веки.

Слава: глас 2

Постника усерднаго и молитвенника изряднаго, / ныне прославим в лике преподобных, / и исповедника крепкаго восхвалим: / смирение, терпение и кротость стяжавшаго / и ко истинней вере отцы наша обратившаго. / Того, братие, ныне почтим, совершая честную память его.

И ныне: Богородичен, глас тойже:
Приидите, Матерь Света, песньми немолчными зовуще, вси прославим, / Та бо роди спасение наше: / и радуйся, принесем яко Единей рождшей всех Начальнейшаго, / иже прежде век Бога: / радуйся, яже Еву падшую паки наздавшая: / радуйся, Пречистая Дево Неискусобрачная.

 

На стиховне стихиры, глас 6.

Исповедника терпеливейшаго, / постника и молитвенника изрядно восхвалим / и честную память его воспоим, / почитающе труды и добродетели его / и к нему вопиюще: / о нас моли Христа Бога нашего, преподобне отче Алексие, / прославляющих честную память твою.

Стих: Честна пред Господем смерть преподобных Его.
Светильника Карпатския Руси, преподобнаго отца нашего Алексия, ныне восхвалим всечестне и прославим подвиги и труды его, имиже потрудися яко новый апостол, ныне же моли о нас Христа Бога нашего, да подаст нам оставление грехов, и утвердит нас стояти в вере Православней.

Стих: Блажен муж бояйся Господа, в заповедех Его восхощет зело.
Преподобне отче Алексие, честна и всехвальна есть память твоя, ты бо потрудился еси во благовестии Христове, просвещая и утверждая люди карпатския, и поучая вся терпети правыя ради веры, да получат светлыя венцы от Христа Бога нашего, Спасающаго души наша.

Слава: глас 3.
Звездо Карпатская, светильниче земли нашея, преподобне отче Алексие, славим вси честныя труды Твоя, ты бо благословение Горы Афонския земли нашей принесл еси, идеже сподобился еси отеческия веры Православныя сочетатися, юже непоколебиму соблюсти, даже до кончины нашея, моли Всеблагаго Господа, Христа Бога нашего.

И ныне: глас тойже, Богородичен:
Без семене от Божественнаго Духа, волею же Отчею зачала еси Сына Божия, от Отца без матере прежде век суща: нас же ради, из Тебе без Отца бывша, плотию родила еси, и Младенца млеком питала еси. Темже не престай молити, избавитися от бед душам нашим.

Тропарь преподобного, глас 8.

Возлюбивши всем сердцем Истину, / узы и страдания многоразличныя кротко претер-певши, / благословение Святыя Горы Афонския принесл еси, / и на Руси Закарпатстей Православие возродил еси, / преблаженне отче наш Алексие, / моли Христа Бога раздоры искоренити, / и ниспослати душам нашим мир и велию милость.

На литии: по Благословении хлебов:

тропарь преподобного дважды и
“Богородице Дево” единожды.

На Утрени:

По “Бог Господь”
тропарь преподобнаго дважды, Слава: и Ныне: Бородичен “Иже нас рождейся”.

По 1 – м стихословии седален глас 4:

От юности Православие возлюбивши, и на Горе Афонстей братиею обители Пантелеимоновы к сему причтен был еси, от нея же в благословение икону Богородицы “Акафистную” в утверждение веры истинныя в земли Карпатстей улучил еси. Тем же с Пречистою Девою о нас Христу Богу молися, спастися душам нашим.

Слава: и ныне: Богородичен:
Нескверная Агнице и Чистая Голубице, преславно Девою пребывши, Бога Слово в Пречистем чреве Твоем вместила еси, и Того на руках носила и питала еси. Приими от нас Архангельское пение: радуйся Благодатная, Господь с Тобою.

По 2 – м стихословии седален глас 7:

За веру Христову гоним был еси, и от латинян биение кротко претерпел еси; в темницу всажден и неправедным судом осужден был еси, подобяся Страстоположнику Христу. Темже моли Его прощение прегрешений даровати нам, днесь почитающих честную память твою, преподобне отче Алексие.
Слава: и ныне: Богородичен:
Пречистая Владычице и Предстательнице всего мира, утоли скорби и болезни рабов Твоих, прославляющих Имя Твое, Богородице, и с преподобным Алексием о нас Христа Сына Твоего моли, грехов отпущение нам даровати.

 

По полиелее седален, глас 5.

Преподобне отче Алексие, исповедниче Руси Карпатския, услыши моление чад твоих: вере Православней в земле нашей утвердитися и в ней непоколебимо пребывати Христа Бога моли, прославляющих честную память твою.

Слава, и ныне, Богородичен:
Богородице Дево, о нас Сына Твоего моли, воспевающих Тебе, Владычице, да сподобит и нас пребывати с Тобою во Царствии Его.

Таже степенна, 1 – й антифон 4-го гласа: От юности моея:

Прокимен глас 4: Честна пред Господем смерть преподобных его.
Стих: Что воздам Господеви о всех, яже воздаде ми?

Всякое дыхание:

Евангелие от Матфея, зачало 43.

По 50 – м псалме стихира, глас 6:

Преподобне отче Алексие, светило земли Карпатския, множество ран от мучителей претерпел еси, исповедуя Христа, свыше укрепляюща тя в подвизе твоем. Ты люди наша Церкви Христовой приобщил еси, и на Руси Карпатстей Православие возродил еси. Темже моли о нас Пресвятую Троицу: в вере сей до конца дней наших пребыти, и христианской кончине дароватися нам и грехов оставлению.

Канон преподобного, глас 1.
Егоже краестрочие: “Апостола земли Карпатския восхвалим”

Песнь 1

Ирмос: Песнь победную поим вси Богу, сотворшему дивная чудеса мышцею высокою и спасшему Израиля, яко прославися.

Апостола новаго и исповедника твердаго ныне торжественно прославим, преподобного Алексия, в Карпатстей Руси подвизавшегося и народ свой в Православии утвердившего.

Подвизаяся во обители святителя Николая, усердно молился еси, отче, подвиги иноческия совершая, и о Боге памятовал еси деннонощно и пред Ним, яко слуга пред воеводою, со страхом ходил еси.

Слава: От юности отеческую веру возлюбил еси и на Святей Горе Афонстей к ней сопричтен был еси; икону Богоматере оттуду в благословение народу нашему принесл еси, в исповедании веры его утверждая.

И ныне: Се Богу чистотою и смирением угодила еси, яко сподоби Тя быти Материю Сына Своего, и Духом Своим осенив, Кивотом содела.

Песнь 3

Ирмос: Да утвердится сердце мое в воле Твоей, Христе Боже, иже над водами небо утверждей второе и основавый на водах землю, Всесильне.

Твердость веры во исповедании твоем показал еси и, яко крепкий адамант, ради Христа узы и страдания претерпел еси, преподобне, от Негоже венец в Царствии Небеснем прияти сподобился еси.

О народе твоем доброе попечение имел еси, таинствам церковным того приобщая и ко Христу овцы новыя приводя, ко ограде церковней тех сопричитая

Слава: Любовь, яже есть союз совершенства, стяжал еси, к Богу онею горел еси, и ради сего мучения ни во чтоже вменял еси, Его ради все претерпевая.

И ныне: Аки жезл Ааронов прозябши, Богородице Дево, родила еси Христа Сына Божия, из чрева Своего Того воплотивши.

Седален глас 5:

Преподобне отче Алексие, столп Православия в земли нашей пребыл еси, утверждая в вере предков наших, в оней же и нас и детей наших до конца дней наших пребыти научити, да сподобимся вси вечери Божественныя в Царствии Небеснем.

Слава, и ныне:
Покровом Твоим огради Богородице Землю Карпатскую, в ней бо множество иноков и инокинь во Имя Твое подвизаются, прославляя Тя, Матерь Цареву и Покровительницу нашу.

Песнь 4

Ирмос: Духом провидя, пророче Аввакуме, Словесе воплощение, проповедал еси, вопия: внегда приближитися летом – познаешися, внегда приити времени – покажешися. Слава силе Твоей Господи.

Земная оставил еси, преподобне отче, в умету вся оныя вменяя, к горним востекл еси, мирское житие оставив: в иноческия обители устремился еси и Богу в них усердно служил еси.

Егда, млад сый, размышлял еси о житии твоем, отче, к старцу Аркадию пришел еси, и вопросил еси его: на иночество благословение от него получил еси.

Слава: Обитель преподобного Онуфрия в Земле Холмстей посетил еси, и в ней с братиею усердно трудился еси: в ней же монашество и священный сан прияти сподобился еси, и ко отцем нашим послан быв, во страданиих за веру тех укрепляя.

И ныне: Ликующе поем Тя в песнех, восхваляем Избранную Богоотроковицу, Тобою бо спасение улучихом, воплощением из Тебе Бога Слова, Всенепорочная.

Песнь 5

Ирмос: Светлый нам возсия Свет Присносущный утренюющим о судьбах заповедей Твоих, Владыко Человеколюбче, Христе, Боже наш.

Истиннаго исповедника Христова и твердаго столпа Православия почитаем тя, преподобне отче, светло днесь восхваляюще память твою; моли о нас Преблагаго Бога, да помилует нас в день судный .

Карпатский апостол явился еси, преподобне отче Алексие, люди заповеди Евангельскими просвещая и оныя ко Христу Богу приводя, да будут наследницы Царствия Его.

Ангельский чин приял еси блаженне, Богу в нем усердно служил еси, страсти плотския в себе побеждая, подвиги удручая тело свое.

Слава: Ради веры пострадал еси, отче, гонения, биения и заушения кротко претерпевая, к Подвигоположнику очи свои возводя, спасительныя Страсти Его воспоминая, Ему страданьми своими подражал еси.

И ныне: Пресвятая Владычице, Мати Христа Бога, Того неизреченно родивши, даруеши мирови мир и спасение душам нашим.

Песнь 6

Ирмос: Пророка Иону подражая вопию: живот мой, Блаже, свободи из тли и спаси мя, Спасе мира, зовуща: слава Тебе.

Ангелоподобное житие показал еси, преподобне, постом, молитвою, бдением, коленопреклонением; оными подвиги страсти твоя потребил еси, смирением и терпением врага рода нашего победил еси.

Ты явился еси в сонном видении настоятелю обители, в нейже подвизался еси, отче, из воды мощи твоя подъяти повелевая и оныя на поклонение поставити, да христоименитыя люди, к ним притекающе, исцеление улучат.

Слава: Славословие Богу приносил еси непрестанно, сладчайшее Имя Христа во устех имел еси, преподобне, и к Нему очи мысленныя всегда устремлял еси.

И ныне: К Матери Царевой усердно припадем, во чреве Своем Бога понесшей, и молимся к Ней: да грехов наших испросит оставление.

Кондак, глас 4.

Звезду Карпатскую почтим, лучезарным светом возсиявшую и апостолом уподобившуюся, богоносного отца нашего Алексия, Православие возлюбившаго и народ свой ко истенней вере возратившаго, темже и мы ему благодарно возопиим: радуйся многомощное светило Руси Карпатския.

Икос

Благодарение Богу нашему возслем, яко не остави нас в заблуждении латинстем пребывати, и воздвиже от народа нашего преподобного отца нашего Алексия. Той бо люди наша ко истинней вере возврати, и светом Евангелия всех нас просвети, предстоит бо ныне у Престола Вседержителя, и молит о нас Пресвятую Троицу о почитающих его и взывающих к нему: радуйся, многомощное светило Руси Карпатския.

Песнь 7

Ирмос: Пещь, Спасе, орошашеся, отроцы же, ликующи, пояху: отцев Боже благословен еси.

Иго Христово на рамех твоих терпеливодушно носил еси, и Ему в страданиих твоих подражая, был еси яко адамант несокрушим, вся раны, с благодарением Богу, терпел еси, вопия Тому: отцев Боже благословен еси.

Яко адамант драгоценнейший честныя мощи твоя обретошася, и тии в раку положени быша, да точиши чудеса всем к тебе припадающим и помощи твоея просящим, будеши же покровитель Земли Карпатския, Бога о нас усердно моля: отцев Боже благословен еси.

Слава: Воистину апостол земли нашея явился еси, преподобне отче наш Алексие, уловил еси в сети Христовы люди твоя, Бога в истинней вере чтити научая и верно Ему вопити: отцев Боже благословен еси.

И ныне: О Владычице, покрый честным Твоим омофором люди Твоя, Тя истинно Богородительницу прославляющих, и молися к Сыну Твоему, да спасет нас Своею благостию, и мы прославим Его: отцев Боже благословен еси.

Песнь 8

Ирмос: Егоже ужасаются ангели и вся воинства, яко Творца и Господа, пойте, священницы, прославите, отроцы благословите, людие, и превозносите во вся веки.

Смирением и терпением скорбей угодил еси Богу, всеблаженне, и ныне с лики ангельскими прославляеши Троицу Пресвятую, радуяся неизреченно, и вопия: священницы пойте, отроцы благословите, людие превозносите во вся веки.

Хвалим тя, отче наш Алексие, яко ты на ниве Христовей потрудился еси, отцы наша к Православию привел еси, и ныне молися о нас, чадех их, да подаст нам Христос Бог оставление грехов, вопиющим: священницы пойте, отроцы благословите, людие превозносите во вся веки.

Слава: Велика тя угодника прославляем, преблаженне, яко ты ради Христа вся претерпел еси и чада твоя к вере правей возвратил еси, апостолом подобяся, и ныне с ними купно вопиеши: священницы пойте, отроцы благословите, людие превозносите во вся веки.

И ныне: Ангелов Радость, Престол Херувимский еси Всечистая, на Немже Христос почи, Тя Деву Чистейшую Богородительницу содела; Ты же, Богомати, со всеми святыми вопиеши: священницы пойте, отроцы благословите, людие превозносите во вся веки.

Песнь 9

Ирмос: Живоприемный Источник приснотекущий, светоносный Светильник благодати, Храм одущевленный, Сень Пречистую, Небеси и земли пространейшую, Богородицу, вернии величаем.

Любовию прославляем тя, богоносне отче, и благодарение Богу приносим, яко велика светильника стяжахом тя, преславне. Молися о нас Творцу Богу нашему: да благодатию Его и мы купно с тобою прославим Его в Горнем Иерусалиме. (Дважды )

Слава: Источника чудес преславнаго проповедуем тя, преподобне отче, светильника пресветлаго и предстателя пред Богом усерднаго, Того непрестанно моли о нас, чадех твоих.

И ныне: Молим Тя, Пречистая, избави нас от страстей и грехов наших, и Христу о нас молися с преподобным Алексием, да простит, Человеколюбец, вся беззакония наша.

Светилен, глас 1

Звезду, возсиявшую в Руси Карпатстей, ныне торжественно воспоим, преподобного и богоносного отца нашего Алексия, той бо к вере Православней народ наш возврати; темже и мы, молитвами его, в сей вере непрестанно пребудем.

Слава: и ныне: Богородичен
Кивот священный почитаем Тя, Пречистая, Ты бо вместила еси во утробе Твоей Невместимаго, Яже воплотися от чистых кровей Твоих, да спасет нас от наших грехов , яко Милосерд.

 

На хвалитех стихиры на 4, глас 2
Подобен : Доме Евфрафов:

Преподобне отче наш Алексие, Звездо Карпатская, ты бо возсиял еси в стране нашей светом Православия, тем тя ныне ублажаем.

Преподобне отче наш Алексие, новый исповедниче Христов, моли о народе нашем в вере Христовой до конца пребыти, и оную непорочно соблюсти, и Царствие Небесное стяжати.

Исповедниче земли Карпатския, богоносне отче наш Алексие, ныне торжественно прославляем светлую память твою, тем же моли о нас Христа Бога, прощение грехов нам даровати.

Лучезарная Звездо Карпатская, отче наш Алексие, ты бо возсиял еси яко светильник Христов и ныне сияеши богоугодным житем твоим. Мы же восхваляем память твою, богоносне отче наш.

Слава: глас 8

Приидите воспоим, людие, / угодника Христова преподобного Алексия, / той бо народ свой к истинней вере от латинства приведе, / и Евангельским заповедем научи, / тем же ныне, прославляя память его, изрядно ему воспоим: / богоносне отче наш Алексие, / всегда ограждай нас от всяких бед и зол, молитвами твоими.

И ныне: глас тойже

Небесная поют Тя, Обрадованная, Мати Безневестная, / и мы славословим неизследованное Твое Рождество, Богородице, / моли спастися душам нашим.

Славословие великое.

И отпуст.

 

На Литургии:

Блаженны святаго от канона, песнь 3-я и 6-я.

Прокимен, глас 7:
Честна пред Господем смерть преподобных Его.
Стих: Что воздам Господеви о всех, яже воздаде ми.

Апостол к Галатом, зачало 213.

Аллилуия:
Блажен муж бояйся Господа, в заповедех Его восхощет зело.
Стих: Сильно на земли будет семя его.

Евангелие от Луки, зачало 24.

Причастен: В память вечную будет праведник, от слуха зла не убоится.